सन् २०१८ देखि डोनाल्ड ट्रम्पले पाकिस्तानसँगको सम्बन्धमा व्यक्तिगत स्वार्थ र व्यापारिक फाइदालाई प्राथमिकता दिँदै आएको देखिन्छ। उनले पाकिस्तानलाई दिइएको आर्थिक सहायता र सुरक्षा सहयोगप्रति निराशा व्यक्त गर्दै आए। ट्रम्प प्रशासनले पाकिस्तानसँग सुरक्षा सहयोग स्थगित गर्ने, व्यापार सम्झौता गर्ने र अन्य ‘कूटनीतिक कदम’ चाल्ने निर्णय गरेका थिए।
पाकिस्तानले विभिन्न आतंकवादी समूहलाई आश्रय र सैन्य सहायता उपलब्ध गराइरहेकै छ। चीनसँग निकट साझेदारी राख्ने पाकिस्तानसँग अमेरिका आफ्नो मध्यपूर्व नीति र व्यापार हित सुरक्षित गर्न नजिक हुँदै आएको छ। गत जुलाईमा भएको व्यापार सम्झौताले ऊर्जा, खानी, सूचना प्रविधि र क्रिप्टोकरेन्सी क्षेत्रमा पाकिस्तान–अमेरिका सहकार्यको संकेत दिएको छ।
भारतका लागि पाकिस्तानसँगको ट्रम्पको नजिकिता चुनौतीपूर्ण बनेको छ। भारत–अमेरिका सम्बन्धमा व्यापार विवाद र उच्च भन्सार महसुल लागू गरिएको र पाकिस्तानसँगको सहकार्यले भारतको रणनीतिक सुरक्षामा असर पार्ने सम्भावना देखिएको छ। विश्लेषकका अनुसार ट्रम्पको विदेश नीति व्यक्तिगत लाभ र व्यापार स्वार्थमा आधारित भएको छ, जसले दक्षिण एशियामा अस्थिरता बढाउने जोखिम रहेको छ।
