निर्वाचन प्रयोजनका लागि उपलब्ध गराइएका सवारी साधन हालसम्म सम्बन्धित कार्यालयमा फिर्ता नभएको विषयमा गम्भीर ध्यानाकर्षण गराइएको छ। जेन्जि चितवनका अध्यक्ष रबिन्द्र भण्डारि ले जिल्ला निर्वाचन कार्यालय चितवनलाई सम्बोधन गर्दै पठाएको पत्रमार्फत निर्वाचन कार्य सम्पन्न भइसकेपछि पनि केही सवारी साधन फिर्ता नभएको जानकारी प्राप्त भएको बताएका छन्।
पत्रमा उल्लेख भएअनुसार ती सवारी साधन आयोग वा जिल्ला निर्वाचन कार्यालयको नाममा दर्ता रहेको सरकारी सम्पत्ति भएकाले निर्वाचन कार्य सकिएलगत्तै विधि र प्रक्रिया अनुसार सम्बन्धित कार्यालयमा फिर्ता गरिनु पर्ने प्रावधान रहेको छ।
यस विषयमा पटक–पटक मौखिक तथा लिखित रूपमा ताकेता गरिँदा पनि हालसम्म सवारी साधन फिर्ता नभएको जानकारी प्राप्त भएको जनाइएको छ। सरकारी सम्पत्तिको यस प्रकारको प्रयोग तथा रोक्का रहनु उचित नभएको पत्रमा स्पष्ट गरिएको छ। त्यसैले २४ घण्टाभित्र आवश्यक कागजात तथा स्रेस्तासहित सवारी साधन जिल्ला निर्वाचन कार्यालय चितवन मा फिर्ता बुझाउन अनुरोध गरिएको छ।
यदि तोकिएको समयभित्र सवारी साधन फिर्ता नभएमा जेन्जि चितवनले गाडी जफत गरी प्रचलित कानुन बमोजिम जिल्ला प्रहरी कार्यालय चितवन लाई बुझाउने प्रक्रिया अघि बढाइने चेतावनी समेत दिइएको छ। अध्यक्ष भण्डारीले “गाडी फिर्ता नगर्नु भनेको सरकारी सम्पत्तिको दुरुपयोग हो” भन्दै यस विषयमा सम्बन्धित निकायको गम्भीर ध्यानाकर्षण गराएका छन्।
