उत्तर कोरियाली नेता किम जोङ उनकी बहिनीले दक्षिण कोरियाली अधिकारीहरुसँग सम्बन्ध तोड्ने यो उच्च समय भएको प्रतिक्रिया दिएकी छन् ।
दक्षिणलाई लक्षित गर्दै आफ्नो सेनाले ‘शत्रुविरुद्ध’ अर्को कडा कारवाही गर्नसक्ने पनि किमकी बहिनी किम यो जोङले चेतावनी दिएकी छन् । साथै दक्षिणविरुद्ध विज्ञप्ति निकाल्दै विरोध जनाउनु भन्दा पनि अब श्रृंखलावद्ध रुपमा बदला लिनु उपयुक्त भएको उनको भनाइ छ । दक्षिणको व्यवहारप्रति उनले आपत्ति जनाउँदै उनले यस्तो भनेकी हुन् ।
उत्तरकी नेत्री किमले शनिबार उत्तर कोरियाली सरकारी न्युज एजेन्सीमार्फत् यस्तो चेतावनी दिएकी हुन् । ‘फोहोर डस्टबिनमा फालिनैपर्छ, सर्वोच्च नेता, हाम्रो पार्टी र राज्यको तर्फबाट मैले पाएको अधिकार प्रयोग गर्दै मैले सेनालाई शत्रुविरुद्ध अर्को कारवाही गर्न निर्देशन दिएको छु,’ नेत्री किम यो ले भनेकी छन् ।
किमकी बहिनीले यसअघि पनि दक्षिणलाई यस्तै किसिमको चेतावनी दिएकी थिइन् । हाल दक्षिण कोरियाली उच्च अधिकारीहरु आइतबार भिडिओ मार्फत आपतकालिन बैठक बसेका छन् । कोरियाली प्रायद्धीपमा हालको अवस्था र सम्भावित प्रतिक्रियाबारे छलफल गर्न बैठक बसिएको बताइएको छ ।
दक्षिण कोरियाले अघिल्लो साता उत्तरकी नेत्री किम यो विरुद्धका पर्चा रोक्न लगाउने जनाएको थियो । उत्तरमा किम योलाई नेता किमले उत्तराधिकारीको रुपमा अघि सारेपछि उनीविरुद्ध लाखौं पर्चा सीमा क्षेत्रमा फाल्ने गरिएको थियो । सोही कारणले पनि पछिल्लो समय उत्तर र दक्षिणबीच थप मनमुटाव उत्पन्न भएको थियो ।
