चितवन, २३ चैत । नेकपा माओवादी केन्द्रका अध्यक्ष पुष्पकमल दाहाल प्रचण्डले महिलाले नेतृत्व गरेको स्थानिय तहमा विकासले फट्को मारेको बताउनुभएको छ । बुधबार चितवनमा सुकुम्बासीलाई लालपूर्जा वितरण गर्दै उहाँले महिलालाई जिम्मेवारी दिएमा बेइमानी, जालझेल र षड्यन्त्र कम हुने बताउनुभएको हो ।
दाहालले ३० वैशाखमा हुने निर्वाचनमा स्थानीय तहका प्रमुख र उपप्रमुख महिलालाई बनाउने आफ्नो चाहना भएको समेत बताउनुभएको छ । अध्यक्ष दाहालले इमान्दार मान्छेलाईलाई जिम्मेवार काम सुम्पीन सकेको कारण नै चितवनका भुमिहिनलाई जग्गाधनी पुर्जा वितरण गर्न सकेको भन्दै अव आउने दिनमा देशभरका भुमिहीनहरुको समस्या छिटोभन्दा छिटो समाधान गर्ने प्रतिवद्धता समेत व्यक्त गर्नुभयो ।
कार्यक्रममा भूमि, व्यवस्था, सहकारी तथा गरिबी निवारणमन्त्री शशी श्रेष्ठले संविधानमा भएको नागरिकको हक कार्यान्वयनलाई अहिलेको सरकारले पहिलो प्राथमिकतामा राखेको भन्दै जनताको काम गर्न स्थानीय तहका जनप्रतिनिधि र मातहतका कर्मचारीलाई इमान्दार भएर लाग्न आग्रह गर्नुभएको छ ।
सो अवसरमा भरतपुर महानगरपालिका २ आँपटारीका ४६ जना भूमिहीन दलितले जग्गाधनी पुर्जा पाएका छन् । उनीहरुले प्रतिव्यक्ती १३ सय वर्गमिटरका दरले जग्गा पाएका हुन् । लालपुर्जा वितरण कार्यक्रममा भरतपुर महानगर प्रमुख रेनु दाहाल, राष्ट्रिय भूमि आयोग चितवनका प्रमुख बद्री तिमिल्सिना लगायतको उपस्थिति रहेको थियो ।
