दुर्गा प्रसाईंका बडीगार्ड दीपक खड्का पक्राउ, अनुसन्धान सुरु
काठमाडौँ । जिल्ला प्रहरी परिसर काठमाडौंको टोलीले दुर्गा प्रसाईंका बडीगार्ड दीपक खड्कालाई मंगलबार नियन्त्रणमा लिएको छ। यसअघि सोमबार मध्यरात भक्तपुरस्थित निवासबाट प्रसाईंलाई पक्राउ गरिएको थियो।
प्रसाईंमाथि सामाजिक सञ्जालमार्फत आन्दोलन भड्काउने, अफवाह फैलाउने र सार्वजनिक शान्ति खलल पार्ने गतिविधि गरेको आरोप छ। जिल्ला प्रहरी परिसर काठमाडौंका एसपी पवनकुमार भट्टराईका अनुसार, उनका अभिव्यक्तिले नागरिकमा डर र त्रास फैलाएको र राजनीतिक तथा निजी व्यक्तित्वमाथि लाञ्छना लगाएको पाइएको छ।
खड्का माथि पनि अभद्र व्यवहारको आरोपमा अनुसन्धान सुरु गरिएको छ। प्रसाईंको यो चौथो पटकको गिरफ्तारी हो। यसअघि उनी आसामबाट पक्राउ गरी नेपाल ल्याइएका थिए। २०८१ चैतमा तीनकुने आन्दोलनपछि उनी भारतबाट नियन्त्रणमा लिइएको थियो। त्यतिबेला आन्दोलन हिंसात्मक भएको र दुई जनाको मृत्यु तथा २० जना घाइते भएका थिए। प्रहरीले नागरिक सुरक्षा र सार्वजनिक शान्ति कायम राख्न अनुसन्धान जारी राख्ने जनाएको छ।
