आज दिउँसो २ बजे प्रधानमन्त्री तथा मन्त्रिपरिषद्को कार्यालय, सिंहदरबारमा मन्त्रिपरिषद् बैठक बस्दैछ। यस हप्ता नियमित सोमबार र बिहीबार बस्ने बैठकहरू स्थानान्तरण भएर शुक्रबार बस्ने भएका हुन्। हिजो बिहीबार केन्द्रीय सुरक्षा समितिको बैठक बसेकोले मन्त्रिपरिषद् बैठक सरेको थियो। बैठकले फागुन २१ गते हुने प्रतिनिधि सभा निर्वाचनको सुरक्षाका लागि सेना परिचालन गर्ने निर्णय गर्ने तयारी गरेको छ। यसअघि बिहीबारको राष्ट्रिय सुरक्षा परिषद्को ४१औँ बैठकले संविधानको धारा २६६ को उपधारा (१) बमोजिम स्वतन्त्र, निष्पक्ष र भयरहित वातावरणमा निर्वाचन सम्पन्न गर्न सेना परिचालनको सिफारिस गर्न मन्त्रिपरिषद्समक्ष निर्णय गरेको थियो ।
सरकारले निर्वाचन केन्द्रित शान्ति सुरक्षामा ध्यान दिँदै एकीकृत निर्वाचन सुरक्षा योजना-०८२ केन्द्रीय सुरक्षा समितिबाट पारित भइसकेको छ। गृहमन्त्रालयले रक्षा मन्त्रालयमार्फत सुरक्षा परिषद्मा आवश्यक पत्राचार पनि गरिसकेको छ। भदौ २३–२४ को जेनजी आन्दोलनले बिग्रिएको शान्ति सुरक्षाको अवस्था अझै पूर्ण रूपमा सामान्य नभएको कारण यसपटक अन्य निर्वाचनभन्दा पहिला नै नेपाली सेनालाई फिल्डमा खटाउने तयारी गरिएको छ। यसअघि सेना प्रायः निर्वाचनको एक महिनाअघि मात्र परिचालन गरिन्थ्यो ।
