नेकपा एमालेका वरिष्ठ उपाध्यक्ष ईश्वर पोखरेलले पार्टीको एघारौँ महाधिवेशनका लागि तयार गरिएको विस्तृत अवधारणापत्र सोमबार पार्टी केन्द्रीय कार्यालयमा बुझाएका छन्। ललितपुरको च्यासलस्थित कार्यालयमा पुगेका पोखरेलले आफ्नो समूहका नेताहरूसहित महासचिव शंकर पोखरेललाई उक्त दस्तावेज औपचारिक रूपमा हस्तान्तरण गरेका हुन्।
पार्टीभित्र पछिल्ला केही समयदेखि देखिएको आन्तरिक द्वन्द्व, नेतृत्वको दिशा–दृष्टि, संगठन संरचना र आगामी महाधिवेशनको तयारीलाई केन्द्रमा राखेर तयार पारिएको उक्त अवधारणापत्रमा नेतृत्व परिवर्तन आवश्यक रहेको निष्कर्ष स्पष्ट रूपमा समावेश गरिएको उपाध्यक्ष सुरेन्द्र पाण्डेले बताए। उनका अनुसार, वर्तमान नेतृत्वको शैली, निर्णय प्रक्रिया तथा संगठन सुदृढीकरणका उपायहरूबारे गम्भीर मूल्यांकन गरिएको र त्यसको समाधानका रूपमा नयाँ नेतृत्वको आवश्यकता प्रस्तुत गरिएको छ।
पोखरेल समूहले बुझाएको अवधारणापत्रले पार्टीको भावी मार्गनिर्देशन, नीतिगत सुधार, अनुशासन लागू गर्ने प्रणाली, युवा नेतृत्वको भूमिका र आन्तरिक लोकतन्त्र सुदृढ गर्ने विषयमा विस्तृत प्रस्ताव राखेको समझिएको छ। अवधारणापत्र बुझाउने क्रममा पोखरेलसँगै उपस्थित उनका निकट नेताहरूले यही दस्तावेजलाई आगामी महाधिवेशनमा समूहगत धारणा तथा बहसका मुख्य आधारका रूपमा अघि सारिने बताएका छन्।
सोमबार दिउँसो भएको दस्तावेज हस्तान्तरणलाई एमालेभित्र उत्पन्न भइरहेको नेतृत्वसम्बन्धी बहसको महत्वपूर्ण घटनाक्रमका रूपमा हेरिएको छ। पार्टीभित्र नयाँ नेतृत्वको माग बढिरहेको बेला पोखरेल समूहको यस कदमले महाधिवेशनमा नेतृत्व प्रतिस्पर्धा थप चर्किने संकेत देखिएको विश्लेषकहरूको भनाइ छ।
