०५ बैशाख २०७७ ,कोरोनाको त्रासको कारण नेपाललाई लकडाउन गरिएको छ । लकडाउन गरिएको झण्डै १ महिना हुन लागिसक्यो । यो लकडाउन अझै लम्बिने अनुमान धेरैले लगाइरहेका छन् । लकडाउनका कारण सबैभन्दा धेरै समस्यामा दैनिक ज्याला मजदुरी गर्नेहरु परेका छन् ।
लकडाउनका कारण काम नभएपछि धेरै मजदुरहरुलाई दैनिक गुजारा चलाउनै गाह्रो भैरहेको छ । यस्तै चर्चित कलाकार कुमार कट्टेल (जिग्री) ले सामाजिक सञ्जालमा लामो स्टाटस लेख्दै लकडाउनका कारण अलपत्र परेका मजदुरहरुलाई घर जाने व्यवस्था मिलाइदिन आग्रह गरेका छन् ।
उनले लेखेका छन्, ‘प्रधानमन्त्री ज्यू, तपाईं त सरकारको नेतृत्त्व गरिरहेको कम्युनिस्ट पार्टीको अध्यक्ष, कम्युनिस्ट पार्टी त मजदुर र सर्वहारा वर्गको पार्टी हो सुनेको थिएँ,’ कुमार कट्टेल लेख्छन्, ‘आज विपत्तिमा गरीब, मजदुरहरु भोकभोकै हिँडेर घर गइरहँदा तपाईको पार्टी र सरकार गरीब र मजदुरकै हो र भन्ने प्रश्नमा मनमा आयो ।’
उनले यो देशको नागरिकको हैसियतले जिल्ला–जिल्ला र स्थानीय तहको समन्वयका लागि पास मिलाइदिन पनि अनुरोध गरेका छन् ।
