दैनन्दिन व्यस्तताका कारण धेरैजसो मानिस पिसाब लाग्दा पनि रोकेर बस्ने गर्छन्। तर चिकित्सकहरूले यस्तो बानीलाई अत्यन्त खतरनाक बताउँदै समयमै पिसाब नगर्नु शरीरका विभिन्न अंगमा गम्भीर असर पर्न सक्ने चेतावनी दिएका छन्। स्वास्थ्य विशेषज्ञहरूको अनुसार पिसाब रोकिराख्दा मूत्राशयमा पिसाब लामो समय जम्मा हुने भएकाले खनिज तथा लवणहरू थुप्रिँदा क्रिस्टल बन्ने सम्भावना बढ्छ। यसले भविष्यमा पत्थरीको जोखिम उच्च बनाउने बताइन्छ। मूत्राशयमा धेरैबेर पिसाब रहँदा ब्याक्टेरियाको वृद्धि तीव्र हुने भएकाले मूत्रनली सङ्क्रमण (युटीआई) हुने खतरा पनि बढ्ने चिकित्सकहरूले बताएका छन्। यस्तो सङ्क्रमण मिर्गौलासम्म फैलिन सक्ने र समयमै उपचार नभए जटिलता सिर्जना हुन सक्ने जनाइएको छ।
बारम्बार पिसाब रोक्ने बानीले मूत्राशयका मांसपेशी कमजोर पार्ने, पिसाब निख्रिएर आउने, पेटको तल्लो भागमा दुखाइ बढ्ने लगायतका समस्याहरू देखिन सक्ने स्वास्थ्यकर्मीको भनाइ छ। गम्भीर अवस्थाका बिरामीमा पिसाब उल्टो दिशा हुँदै मिर्गौलामा फर्किने ‘वेसिको–यूरेटरल रिफ्लक्स’ समेत हुन सक्ने तथा यसले मिर्गौलामा दीर्घकालीन क्षति पुर्याउन सक्ने चेतावनी विशेषज्ञहरूले दिएका छन्। चिकित्सकहरूले पिसाब रोकिरहनु प्राकृतिक प्रक्रिया विरुद्धको क्रियाकलाप भएकाले पिसाब लाग्नेबित्तिकै खाली गर्ने बानी बसाल्न सबैलाई आग्रह गरेका छन्। काम वा यात्राको व्यस्ततालाई कारण बनाएर स्वास्थ्यसँग सम्झौता नगर्न उनीहरूको सुझाव छ।
