काठमाडौँ । अख्तियार दुरुपयोग अनुसन्धान आयोगका प्रमुख प्रेमकुमार राईसहित १० जनालाई ज्यान मार्ने धम्की दिने समूहको मुख्य अभियुक्त प्रकाश पाठक फिलिपिन्समा रहेको खुलेको छ। धम्कीसहितको पत्र अख्तियारमा प्राप्त भइसकेको छ भने भिडिओसमेत सार्वजनिक भएपछि अख्तियारले जिल्ला प्रहरी परिसर काठमाडौँमा जाहेरी दिएको छ।
चार दिनअघि जाहेरी परेपछि काठमाडौँ प्रहरीसहित विभिन्न युनिटले अनुसन्धान सुरु गरेका छन्। धम्कीपूर्ण पत्र पठाउने प्रकाश पाठक फिलिपिन्समा रहेको पत्ता लागेको छ भने उनका तीन जना सहयोगी प्रहरीको नियन्त्रणमा छन्। पक्राउ परेकाहरूले आफूहरू पाठकका बडिगार्ड भएको बताएका छन्।
प्रकाशले भिडिओ रेकर्ड गर्दै अख्तियार प्रमुख राईसहित १० जनाको ज्यान लिने चेतावनी दिएका थिए। भिडिओमा उनका बडिगार्डहरू पनि देखिएका थिए। प्रहरीको दाबी अनुसार, पक्राउ परेकाहरूले धम्कीमा संलग्नता नरहेको दाबी गरेका छन्।
पाठकले आफूलाई उग्रवादी समूह **‘एक्स्ट्रिमिस्ट ग्रुप अफ नेपाल’**को अध्यक्ष भन्दै पठाएको पत्रमा धम्की सूचीमा अख्तियारकै पूर्वप्रमुख लोकमानसिंह कार्की, नेपाल आयल निगमका पूर्वकार्यकारी निर्देशक गोपाल खड्का, कांग्रेस नेता एवं पूर्वगृहमन्त्री रमेश लेखक, सुडान काण्डमा जोडिएका पूर्वप्रहरी प्रमुख ओमविक्रम राना, हेमबहादुर गुरुङ, रमेश चन्द ठकुरी, कांग्रेस सभापति शेरबहादुर देउवाकी पत्नी आरजु राणा, पूर्वगृहमन्त्री बालकृष्ण खाँण र मेडिकल व्यवसायी दुर्गा प्रसाईँ रहेका छन्।
उक्त व्यक्तिहरूको सुरक्षा सतर्कता बढाइएको छ। प्रहरी प्रधान कार्यालयको निर्देशनमा काठमाडौँ उपत्यका प्रहरी कार्यालय रानीपोखरीले तीनवटै जिल्लामा उनीहरूको निवास, हिँडडुल र औपचारिक कार्यक्रममा निगरानी बढाएको छ।
धम्की पत्र नेपाल नागरिक उड्डयन प्राधिकरण (क्यान) का महानिर्देशक प्रदीप अधिकारीविरुद्धको मुद्दासँग सम्बन्धित रहेको शंका गरिएको छ। अधिकारीसहित ७ जनाविरुद्ध बुधबार भ्रष्टाचार मुद्दा दायर भएको छ।
यसअघि पत्रकारहरूमाथि समेत ज्यान मार्ने धम्की आएको थियो। यस विषयमा अन्तर्राष्ट्रिय पत्रकार संगठन IFJ ले पनि नेपाल सरकारको ध्यानाकर्षण गराएको थियो।
