’
मानिसको दिन पुरा भएको छैन भने जस्तो सुकै दुर्घटनावाट पनि जिवित रहन सकिन्छ । हालै पूर्व अफ्रिकी मुलुक मदागस्करका एक मन्त्रीले सो कुराको पुष्टि गरेका छन् । मदागस्कर सरकारका रक्षा एवं प्रहरी मन्त्री सर्ज गेल हेलिकोप्टर दुर्घटनामा परे । समुन्द्रमा दुर्घटना भएको सो विमानमा मन्त्री थिए । तर उनले १२ घण्टासम्म पौडी खेलेर आफ्नो ज्यान जोगाएका छन् ।
मन्त्री गेलेसहित अन्य तीन सुरक्षा अधिकारीको टोली चढेको हेलिकोप्टर सोमबार उत्तर पूर्वी कोस्ट क्षेत्रमा दुर्घटनामा परेको थियो । दुर्घटनाग्रस्त स्थलबाट मन्त्री गेले १२ घण्टासम्म निरन्तर पौडी खेल्दै जमिनसम्म आइपुगेका थिए ।
अधिकारीहरुले मंगलबार बताएअनुसार सो क्षेत्रमा यात्रुबाहक डुङ्गा दुर्घटनामा परेकाहरुको उद्धार र अवलोकनका लागि मन्त्रिसहितको टोली घटनास्थलतर्फ जाँदै थियो ।सोही क्रममा हेलिकोप्टर दुर्घटनामा परेको थियो। सोमबार भएको डुङ्गा दुर्घटनामा परि कम्तीमा ३९ यात्रुको मृत्यु भएको थियो ।
दुर्घटनामा परेका अन्य तीन सुरक्षा अधिकारीले समेत ज्यान जोगाउन सफल भएको अधिकारीहरुले बताएका छन् । दुर्घटनाबाट ज्यान जोगाएका मन्त्री गेलेले ट्विटरमार्फत भनेका छन्, ‘मेरो का ल अझै आइपुगेको छैन । राष्ट्रको हितका लागि भएपनि मैले अझै धेरै बाँच्नु छ ।’ यद्यपि, दुर्घटनापछि उनी सामान्य घाइते भएको बताइएको छ ।
